Војдан Стојановски и сезонава е еден од главните кошаркари во играта на МЗТ Скопје Аеродром, движечка сила во речиси сите напади на актуелниот македонски шампион, но и агресивен во одбраната.

Ветеранот, како и секогаш е оптимист во пресрет на утрешниот дуел против Широки (20.00 часот), прв од четврт-финалето од плејофот во АБА2 лигата, со напомена дека нему и на неговите соиграчи ќе им биде многу полесно да дојдат до целта ако ја имаат поддршката од до крај исполнетите трибини во „Јане Сандански“.

– Плејофот е посебно натпреварување во кое сѐ е можно. Добро го познаваме тимот на Широки. Знаеме дека треба да играме цврсто и агресивно во двата правци од теренот. Ако го сториме тоа и заедно со големата поддршка од нашите верни навивачи, која сигурен сум дека нема да изостане, тогаш може да се надеваме на триумф. Дојдете заедно да го победиме силниот противник – вели еден од браќата Стојановски.

Плејофот во АБА2 се игра во две средби на вкупен кош-количник, поради што е исклучително важно за МЗТ Скопје не само да дојде до победа туку и таа да биде изразена со што е можно поголема разлика. Влезот за утрешниот дуел за јавноста е бесплатен.