Капитенот на македонската репрезентација, Војдан Стојановски, и во наредната сезона ќе го носи дресот на Гравелин Данкерк, откако постигна договор за продолжување на соработката со овој француски прволигаш.

– Задоволен сум што уште сега го решив прашањето каде ќе играм во наредната сезона, односно во еден квалитетен клуб каков што е Гравелин Данкерк. Можам да кажам дека пресудна беше довербата на тренерот, кој ми даде голема слобода во двата месеци што ги минав во клубот. Имавме беспрекорна соработка и очекувам во иста насока да продолжиме и во следната сезона. Секако, со уште подобри резултати од овие кои ги имаше клубот во оваа натпреварувачка сезона – потврдува Стојановски.

По успешниот старт во ЛНБ лигата на Франција како играч на По Лак Ортез, Војдан пристигна во Гравелин Данкерк кон средината на јануари.