Од ЈП „Водовод и канализација – Скопје“ денеска соопштија дека е регистрирана, како што велат, енормно зголемена потрошувачка на вода, особено во попладневните часови и оттаму информираат дека за еден ден во Скопје биле потрошени околу 700 литри вода по жител.

Според податоците од системот за мониторинг и мерење на дневната потрошувачка, на 23 јуни биле потрошени рекордни 356.000 кубни метри вода, што значи дека просечната потрошувачка изнесувала околу 700 литри по жител.

Од претпријатието апелираат до граѓаните во Скопје на совесно и рационално користење и употреба на водата. Особено да се избегнува непотребно трошење на водата за полевање на зеленило, бавчи и ниви, за перење автомобили, за полнење на базени.

Оттаму исто ги повикаа граѓаните кои ќе забележат диви приклучоци на мрежата, да ги пријават на телефонскиот број на претпријатието или на имејл адресата, кои можат да се најдат на нивната веб-страница.