Распоредот на натпреварите, односно термините кои ги дадоа екипите кои се во улога на домаќини во десеттото првенствено коло од Првата македонска кошаркарска „Мтел“ лига со себе носи и некои дополнителни моменти.

Поврзани се со фактот дека дури три од нив ќе се играат во салата на СРЦ „Кале“, а уште еден во „соседството“ односно во малата сала на „Кале“, каде своите мечеви ги игра екипата на Вардар, која во овој круг од шампионатот го пречекува битолски Пелистер.

Тројната програма ќе биде отворена од 14.00 часот, кога на теренот ќе се појават екипите на Шкупи и на Кожув. Во исто време, но стотина метри „подалеку“ ќе играат и Вардар-Пелистер.

Од 17.00 часот, на програмата е дуелот во кој лидерот во првенството, екипата на ТФТ ќе го дочека кавадаречки Тиквеш Голден Игл, а три часа подоцна, на истото место, ќе се сретнат екипите на Работнички и Гостивар.

Во Скопје ќе се одиграат и преостанатите два натпревари од ова 10 коло. Поточно, уште еден натпревар од овој круг во саботната програма е закажан за СЦ „Јане Сандански“ (во малата сала), каде ќе разигруваат двете „соседски“ екипи, МЗТ Скопје Аеродром и Феникс 2010.

Последниот меч пак е предвиден за недела, од 19.00 часот, ќе се игра во салата „Шабан Трстена“, каде Чаир 2030 е домаќин на МКК Куманово.

ПРВА „МТЕЛ“ ЛИГА-МАЖИ

ДВОЈКИ 10. КОЛО

14.ДЕКЕМВРИ (САБОТА)

14.00: Шкупи – Кожув
14.00: Вардар – Пелистер
17.00: ТФТ – Тиквеш Голден Игл
17.00: МЗТ Скопје Аеродром – Феникс 2010
20.00: Работнички – Гостивар

15.ДЕКЕМВРИ (НЕДЕЛА)

19.00: Чаир 2030 – МКК Куманово

ТАБЕЛА: ТФТ 17 бодови, Чаир 2030 16, МЗТ Скопје Аеродром 15, Работнички 15, Пелистер 15, Кожув 14, МКК Куманово 14, Гостивар 12, Тиквеш Голден Игл 12, Шкупи 12, Феникс 2010 11, Вардар 9.