Одамна е познато дека македонското правосудство е „рак-рана“ на државава и постојано е критикувано, како од домашни, така и од странски иституции. Во судството во Македонија со години недостасуваат соодветен број на судии и обвинители за без проблем да се спроведува правдата, па судовите со актуелниот мал број судии се обидуваат да ги решат дел од големиот број насобрани предмети.

Според судските проценки, во земјава фалат околу 180 судии, а во моментов во земјава има 490 судии. За проблемот да биде поголем, до крајот на годинава во пензија ќе заминат 60 судии. Систематизацијата предвидува дека во судовите се потребни 630 судии за да може предметите побрзо и поефикасно да се решат. Со редовните пензионирања до крајот на следната година во судовите ќе има за околу 180 судии помалку од предвидената систематизација.

И Обвинителството нема соодветен број на стручен кадар. До крајот на годинава ќе има 77 празни обвинителски места, а само 29 кандидати за обвинители ќе пополнат мал број работни места од потребите. Вгодина ќе недостигаат 48 обвинители. Основните и вишите јавни обвинителства веќе подолг период „кубурат“ со кадар. Недостигаат дури 60 обвинители. Речиси и да нема обвинителство во Македонија кое работи според систематизацијата што ја пропишал законодавецот, а која бара да бидат вработени барем 260 обвинители.

На есен од Академијата за првпат ќе излезат спремни дури 59 судии и обвинители. Од нив 30 се идни судии, што значи дека ќе недостасуваат уште 130 судии.

Највисокиот суд во земјава, Уставниот суд мака мачи со судски кадар. Ако судиите не гласаат едногласно „за“ или „против“, Уставниот суд не може да донесе ниту една одлука по дестиците предмети кои чекаат на ред затоа што судот работи со законски предвидениот минимум од пет судии наместо девет колку што е предвидено.

Најмалку десетина судии му фалат на Основниот кривичен суд во Скопје, се процените на претседателот на овој суд. Според систематизацијата, Кривичен треба да има 70 судии, но во моментов има околу 50. Дел од нив заминале поради назначување во некој од повисоките судови, некои во пензија, други поради разрешување или на породилно или болничко отсуство.

Шестнаесет судии се во одделот за кривично полнолетни, исто толку има и во одделот за прекршоци, а двајца ги судат предметите за малолетници. Двајца судии има и за извршување санкции, додека 6 се судии на претходна постапка.

Судии и стручни соработници му фалат на Основниот суд во Куманово, кој според бројот на предмети и подрачје кое покрива и по број на жители е меѓу најголемите во државата. Според систематизацијата, Кумановскиот суд треба да има 35 судии, а во моментот работи само со 21. Судот е со проширена надлежност и постапува по предмети во граѓанска и во кривична постапка.

– За жал, во овој момент судот има многу помал број на судии од она што му е потребно во однос на бројот на предмети. Имаме и многу помал број на стручната судска служба, кој треба да ни овозможи поефикасно работење. Ако овој суд согласно одлуката на Судскиот совет за бројот на судии треба да има 35 судии, во моментот работиме со 21 судија. Не зборуваме за судии кои се отсутни поради болест или нешто слично, туку исклучиво за онаа бројка со која судот располага и навистина се соочуваме со сериозни тешкотии и во тој дел. Оптималната бројка за непречена работа е најмалку 25 судии – велат од Основен суд Куманово.

Во последните шест години, од 2011 до денес, во Основниот суд во Штип не е избран ниту еден нов судија. Во моментов на илјадници предмети во најголемиот суд на истокот од државата работат само 15 судии, иако систематизацијата, а и потребите бараат судот да има најмалку 19 судии.

Апелациониот суд во Гостивар е надлежен да постапува по жалби на донесени одлуки од првостепените судови во Гостивар, Тетово, Дебар и Кичево. Она што низ годините се провлекува како еден од главните проблеми на Апелација е недостаток на судии. Според систематизацијата предвидени се вкупно 16 судии, заедно со претседателот, но актуелно Апелација има 11.

Колку судии годинава биле „истресени од гаќи“?