Четири автомобили учествувале во тешката сообраќајна несреќа која се случи вчера попладнето на булеварот „Партизанки одреди“ во Скопје, во близина на мостот „Влајко“, соопшти денеска полицијата.

Вкупно петмина луѓе се повредени, а еден од возачите кои учествувале во верижниот судир избегал од местото, велат од МВР.

„На 10.04.2025 околу 17.30 часот во СВР Скопје било пријавено дека на бул.„Партизански одреди“, во близина на мост „Влајко“ во Скопје се случила сообраќајна незгода помеѓу патничко возило „ауди“ со скопски регистарски ознаки, управувано од Д.С.(39) од Скопје, патничко возило „ауди“ со скопски регистарски ознаки, управувано од З.А.(29) од с.Сингелиќ, скопско, патничко возило „форд фиеста“ со скопски регистарски ознаки, управувано од Т.Т.(46) од Скопје и патничко возило „фиат стило“ со скопски регистарски ознаки, кое го напуштило местото на настанот. Во незгодата со телесни повреди се здобиле возачот З.А. и неговите сопатници Р.Р.(20) од с.Сингелиќ и Ј.А.(20) од с.Батинци, скопско, возачот Д.С. и сопатникот во патничкото возило „форд фиеста“, Д.Т. од Скопје, констатирани во Градската општа болница „Св.Наум Охридски“ и во Комплекс клиники „Мајка Тереза“ во Скопје. Известен е јавен обвинител и се преземаат мерки за расчистување на случајот“, пишува во полициското соопштение.

Сообраќајката и полицискиот увид кој следеше вчера попладне предизвика голем метеж на булеварот кој траеше со часови, бидејќи слободна беше само една коловозна лента.

Тежок судир попладнево на „Партизанска“, учествувале неколку автомобили