Интернационалниот фестивал на античка драма „Стоби“ во своето 19. издание ќе биде отворен на 17 септември со претставата „Антигона“, според Софокле, во режија на Диего Де Бреа, продукција на Београдско драмско позориште од Србија. Под мотото „Во нови слики“ фестивалот ќе трае до 1 октомври.

Во официјалната селекција на 19. ИФАД „Стоби“ се и претставите „Ифигенија“, според Еврипид, во режија на Зоран Ракочевиќ, настаната во копродукција меѓу „Корифеј театар“, ЦК „Колашин“ и ЦК „Бјело Поље“, сите од Црна Гора; „Одисеј“ од Александар Секулов, според Хомер, режија на Диана Добрева, продукција на Драмскиот театар „Н. О. Масалитинов“ од Пловдив, Бугарија; „Еден Едип“, по авторски текст на А. Н. Роса, во режија на Југ Ѓорѓевиќ во Народниот театар од Ниш; „Пандорината кутија: наследството на ќерката“ од Ришард Ниечим и „Медиа Артес“, која ќе биде изведена на 28 септември 2022 година.

Во чест на лауреатите на 1 октомври 2022 година ќе настапи Националната опера и балет со изведбата на современата балетска претстава „Госпоѓиците од Авињон“. Музиката е на Калиопи, кореографија на Олга Панго, а либрето на Сашо Димоски.

Сите претстави започнуваат во 20 часот, а по изведбите на секоја од претставите во официјалната селекција ќе се одржат разговори, тркалезни маси со годинашното кредо на фестивалот „Во нови слики“.

Во составот на комисијата што ќе одлучува за наградите се актерите Ѓорѓи Јолевски и Биљана Драгиќевиќ-Пројковска и режисерот Деан Дамјановски.

(Текстот е објавен во „Културен печат“ број 146, во печатеното издание на весникот „Слободен печат“ на 17-18 септември 2022)