Од полиција во Струга информираат дека за два дена од струшките улици се отстранети и одземени четири автомобили поради предизвикување преголема бучавост. Возилата денеска ќе бидат испратени на вонреден технички преглед по што, ќе следат соодветни поднесоци.

Имено, на 1 август полицијата одзела два автомобили „БМВ“ и едно „Ауди“, додека неколку часа подоцна, односно следниот ден одземено е и возило „Ламборгини“ поради предизвикување голема бучава.

– На 1 авуст во 21 часот, на улицата „15 корпус“ во Струга, сопрено е патничко возило „БМВ“ со швајцарски национални ознаки, управувано од К.Ш. (22) од Струга, со престој во Швајцарија, по што е одземено поради сомнеж за техничка неисправност, која се однесува на предизвикување голема бучава, како и автомобил „Ауди“ со струмички регистарски ознаки, управуван од М.Р.(26) македонски државјанин со престој во Холандија, изјави Димоски.

Истиот ден, заради бучавост сопрен е и автомобил „БМВ“ со струшки регистарски таблици, управуван од Б.А.(45) од струшкото село Радолишта, кај кого дополнително е констатирано дека возилото имало непродолжена важност на сообраќајните документи.

Неколку часа подоцна, односно во 30 минути по полноќ на 2 август поради предизвикување голема бучава запрено е и „Ламборгини“ со германски национални ознаки, управувано од 21-годишниот А.А. од Струга, кој бил на привремена работа во Германија.