Во организација на Националната опера и балет – Мала сцена, а со поддршка од Министерството за култура и туризам, од 22 до 25 април се одржаа „Денови на македонски кореографи“, манифестација со која повторно беше ставена во функција Малата сцена на НОБ.

Манифестацијата беше отворена со премиера на „Мокументари“ на кореографката Адријана Данчевска, за која музиката е на Александар Гроздановски, сценографијата на Ивана Мојсовска, а настапуваат Дејан Битровски и Адријана Данчевска. „Mockumentary“ е танцова претстава која ja истражува политичката сцена и улогата на изведувачот во таа приказна. Од позиција на тело, во оваа динамична и често контрадикторна стварност – самоопределување. Саркастичен и манипулативен пристап создава конфликт. Танцот станува метафора на нестабилност и постојана промена, додека хуморот ги открива апсурдните аспекти на моќта.

Во вториот дел од првата вечер беше изведена претставата „Ехо на баронот“ на кореографот Дејан Битровски, за која музиката е на Herzel, сценографијата на Матеа Мијановиќ, а настапуваат Анастасија Данчевска, Стефани Шаршмит и Нина Петрушевска.

Ова е танцова претстава што ја истражува психолошката манипулација во современото општество преку темите на синдромот Минхаузен и неговата модерна манифестација. Изведбата прикажува како луѓето се принудени да создадат искривени верзии од себе под влијание на социјалните медиуми, дезинформациите и општествените очекувања. Користејќи танц, музика и визуелни елементи, претставата ја нагласува борбата за зачувување на автентичниот идентитет во нашата ера.

Во рамки на „Денови на македонски кореографи“ на 23 април беше отворена изложбата на фотографии „Вечни тела“ на авторите Искра Шукарова и Жарко Стојчевски во соработка со КИЦ-Скопје во Фоаје на НОБ.

Истата вечер беше изведена претставата „Болеро“ во кореографија на Саша Евтимова, со што беа одбележани 150 години од раѓањето на композиторот Морис Равел. Костимограф е Марија Пупучевска, а настапија Балетски солисти и ансамблот на Националната опера и балет.

На 24 април се одржа премиерата на „Д (како Дездемона)“ – современа танцова претстава, инспирирана од трагедијата на Вилијам Шекспир „Отело“ во кореографија и режија на Рисима Рисимкин. Музиката е на Тони Китановски, костимите на Благој Мицевски, а сценограф е Матеа Мијановиќ.

Манифестацијата заврши на 25 април со македонската премиера на современиот балет „Патување“ на кореграфот Џан Арслан од Турција. Музиката е на Езио Босо, асистент-кореограф е Саша Евтимова, а костимите се на Марија Пупучевска.

(Текстот е објавен во „Културен печат“ број 278, во печатеното издание на весникот „Слободен печат“ на 26-27.4.2025)