Градоначалникот на Москва, Сергеј Собјанин денеска најави воведување на нови ограничувања поради „тешката состојба” во градот предизвикана од ширењето на делта сојот на коронавирусот.

Од денеска сите настани со повеќе од 500 луѓе се забранети. Рестораните и баровите во Москва ќе можат да ги посетуваат само вакцинирани лица, оние кои прележале Ковид-19 во изминатите шест месеци или покажат негативен тест не попстар од 72 часа.

Во Москва денеска се регистрирани 6.555 новозаболени, а во цела Русија – 16.715 луѓе, што е двојно повеќе од пред еден месец.

– Одлуките што ги донесуваме се тешки, непопуларни, но неопходни за да се спасат животите на луѓето, истакна Собјанин.

Поради наглото зголемување на бројот на заразени пред две недели, градските власти наредија задолжителна вакцинација на вработените во малопродажбата, просветните работници и лицата вработени во услужниот сектор.

Имунизацијата во Москва бавно се одвива, а помалку од 13 проценти од граѓаните примиле прва доза од вакцината против Ковид-19.