Најновото издание на ИК „Славика либрис“ од Скопје е книгата „Пред да пукне“ од чешката авторка Лидмила Кабртова, а во превод на Донка Роус. Романот е составен од осум приказни за лоши одлуки, несфатеност и надеж. Тој е хроника за разминувањата кои се одвиваат во текот на седумдесет години.

Книгата во концентрирана форма проучува како навидум сосема неважни одлуки на некои луѓе влијаат врз животите на другите луѓе и како сосема незначајна случка може да погоди некого, за кого не можеме ни да претпоставиме. Секој од главните ликови раскажува од сопствена перспектива и секој од нив се труди да ја најде смислата на сопствениот живот.

Лидмила Кабртова (1971) дипломирала новинарство на Факултетот на социјални науки при Карловиот универзитет во Прага, а потоа дипломирала и на групата Маркетинг комуникација на Универзитетот на „Томаш Бата“ во Злин.

Неколку години работела како новинар, потоа се насочила на областа Односи со јавноста, каде што работи повеќе од дваесет години. Авторка е на неколку радиодрами.

Нејзиното прво книжевно дело претставува експериментална проза со наслов „Кого ќе испијат лисиците“, објавено во 2013 г. Во 2018 година ја објавила збирката раскази „Места во темнината“, за која ја добила главната награда од Фондацијата „Чешки книжевен фонд“.

(Текстот е објавен во „Културен печат“ број 178, во печатеното издание на весникот „Слободен печат“ на 13-14.5.2023)