Издавачката куќа „Антолог“ од Скопје објави две дела од Франц Кафка, еден од најголемите книжевни гении на сите времиња. Станува збор за романите „Америка“ во превод на Душанка Каевска и „Замок“ во превод на Бобан Здравковски Андреевски, овој пат со интегрални преводи на македонски јазик што за првпат ги вклучуваат и оригиналните предговори на неговиот пријател Макс Брод, и со тематски дизајн на кориците, кој е дело на Марко Трпески.

– Објавувањето на целосните дела на Кафка е најпрвин исполнување на една лична желба уште од училишните денови, но и голем придонес кон издавачката продукција, зашто навистина нашата читателска публика заслужува да ги има достапни на македонски јазик делата на можеби најзначајниот и најенигматичниот автор на сите времиња. Една од првите десет книги објавени во рамките на нашата едиција „Бранови“ е токму романот „Америка“, чии количини веќе од поодамна беа исцрпени, па неговото реобјавување, но со тематски дизајн, е само прв чекор во новата приказна што планираме да ја испишеме – изјавува Жарко Кујунџиски, главен и одговорен уредник во „Антолог“.

Во следниот период планирано е објавување на капиталното дело „Процес“, „Дневниците“ на Кафка, но и на другите негови познати и помалку познати дела.

Франц Кафка бил автор на визионерска фикција, поседувајќи извонреден талент за соединување на елементите од реализмот и фантастичното. Не залудно неговиот „кафкијански“ стил е влезен како поим во сите книжевни енциклопедии. Според сведочењето на Макс Брод, Кафка го замолил да ги запали сите негови необјавени и незавршени ракописи и романи по неговата смрт. Брод не го послушал, постхумно објавувајќи ги „Процес“ и другите книги што станале класици.

(Текстот е објавен во „Културен печат“ број 118, во печатеното издание на весникот „Слободен печат“ на 26-27 февруари 2022)