Бројот на регистрирани нови автомобили во Европа во 2024 година благо се зголемил (за 0,8 отсто) и изнесува 10,6 милиони автомобили. Возилата со мотори со внатрешно согорување сè уште го задржуваат приматот, објави Европската асоцијација на производители на автомобили (ACEA).

Пад на бројот на регистрации на нови возила е забележан на три големи пазари во Европската унија – Франција (минус 3,2 отсто), Германија (минус 1 отсто) и Италија, (0,5 отсто).

Електричните автомобили со батерии останаа само третиот избор за купувачите во ЕУ, земјите од ЕФТА и Велика Британија во 2024 година. Нивното учество изнесува 15,4 отсто, претекнувајќи ги возилата со дизел погон, со учество од 10,4 отсто.

Автомобилите со бензински мотори го задржаа приматот со вкупно учество од 33,3 отсто. Тоа е нешто повеќе од хибридно-електричните возила, чиј удел на пазарот беше 31,4 отсто, потврдувајќи го второто место во вкупната продажба.