„ВМРО-ДПМНЕ ја попречува работата на институциите во спроведувањето на мерките за справување со дојавите за поставени бомби во училиштата. Јавните настапи на претставници од оваа партија, кои повикуваат на непочитување на новите протоколи, е директно поткопување на дејствувањето на надлежните институции во борбата против хибридните напади“, рече на денешната прес-конференција во Собранието пратеникот Миле Талески од Пратеничката група на СДСМ и коалицијата.

Тој додаде дека безбедноста на учениците и обезбедување на непречен образовен процес се најважни, а новите протоколи за постапувањето изработени од експерти, се во оваа насока.

Како што рече Талески, веќе четири дена наставата се одвива без прекин, а безбедноста на учениците и наставниците е загарантирана. Исто така, посочи тој, обезбедено е и соодветно присуство на полицијата во училиштата.

Според пратеникот, однесувањето на ВМРО-ДПМНЕ „отвора сериозен сомнеж за нивната улога“ во ова.