Без на неа воопшто да се појават пратеници од власта, денешната расправа на Анкетната комисија за заштита на човековите права и слободи помина во знакот на критиките од опозицијата. Таа ги изнесе своите забелешки за, како што велат пратениците од опозициските партии, потфрлањето на институциите поради кои дојде до трагедијата во дискотеката „Пулс“ во Кочани, во која животот го загубија 62-ца млади луѓе.

Потребата за поддршка на оваа иницијатива ја образложи пратеникот и лидер на Левица, Димитар Апасиев, кој претседава со ова тело, пренесе ТВ „24“. Тој го вперува прстот кон Инспекторатот, градоначалникот на Кочани, МВР, како и Министерството за економија, кое ги издава лиценците за работа на ноќните клубови. Апасиев упати прашање до органите и институциите: Како и зошто бројката од над 75 луѓе за кои Обвинителството отвори предмети за случајот, се преполови?

Дека се спремни да дадат поддршка за оваа иницијатива се изјаснија и пратениците од СДСМ и од Европскиот фронт, кои во своите излагања посочија дека наместо вистина, граѓаните и семејствата на загинатите и повреените „добиле само политиканство од власта и органите“. Надлежните институции, обвини опозицијата, работи под владин диктат и ги „поштедува“ актуелните владини функционери, кои притоа и самите не се повлекуваат поради морална одговорност.

Оваа е трета по ред надзорна расправа. На претходната дојдоа пратениците од ВМРО-ДПМНЕ, но кажаа дека нема да гласаат поради тоа што истрагата беше во тек, па образложението на владејачката партија беше дека треба да им се даде простор на институциите да ја затворат. Во меѓувреме, истрагата се затвори, а на денешната дискусија не се појави ниту еден пратеник од владејачките партии.