Временските (не)прилики изминативе денови ги одложија проекциите на три филма од циклусот посветен на Чарли Чаплин под отворено небо во дворот на Кинотеката. Затоа насловите „Детето„, „Светлините на Велеградот и Светлините на сцената“ ќе бидат прикажани во нови термини, на 28 јули и 29 јули.

-Од деца тинејџери чиишто родители доаѓаат и ги оставаат со коли пред кинотеката, до млади парови и возрасни луѓе кои веќе го знаат делото на Чарли Чаплин. Неговото дело е огромно и секогаш наоѓаме некој нов филм кај него – затоа и интересот, изјави во „Утрински брифинг“ на „Слободна ТВ“ Владимир Ангелов, директор на Кинотека на Република Северна Македонија.

Чаплин секогаш застанува на страната на обичниот човек. Ги потенцира убавите страни на малиот човек, додава Ангелов.

-Како Кинотека продолжуваме со проекција на филмови. Ќе го прикажеме оскаровецот „Паразит“. Планираме и соработка со МакеДокс, соработка со Скопје филм фестивал, така што имаме доста програма за овој период, вели Ангелов.