Денеска од 20.45 часот во Полска ракометниот клуб Еурофарм Пелистер во рамките од петтото коло во ЕХФ Лигата на шампионите ќе игра против Висла Плоцк.

После освоениот прв бод во групата А претходното коло против Спортинг, актуелниот македонски шампион ќе брка нови бодови против Висла која досега претрпе четири порази.

Како што најави тренерот на Еурофарм Пелистер, Бранислав Ангеловски, неговиот тим ќе оди да се натпреварува и ќе се обиде да извлече поволен резултат, а не со амбиции да загуби со што помала разлика.

Еден од најискусните во битолскиот состав, Жарко Пешевски вели дека освоениот бод оваа сезона во ЛШ ќе биде додатна мотивација за следните мечеви.

– Висла е екипа со интернационалци, со искусни играчи и со одличен тренер. Негува поразличен ракомет од другите, има гранитна одбрана со искусни голмани и смирен напад. Се подготвуваме максимално како за овој меч, така и за сите. Ако влеземе максимално подготвени имаме шанси, затоа што секоја екипа во ЛШ бара слаби страни на противникот, многу подготовка и видео анализи. Мислам дека ќе биде еден супер неизвесен натпревар – вели Пешевски.