Во рамки на неговата турнеја „Во името на љубовта”, на 13 април во Арена Борис Трајковски, концерт ќе одржи Жељко Самарџиќ заедно со „Пријателите”. Тој беше ексклузивен гостин во утринската емисија „Слободен печат“ и зборуваше за својата љубов кон Македонија и Скопје, за музичката кариера и за концертот, кој го очекува со нетрпение, исто како и неговата македонска публика.

– Прво да кажам љубовта кон Македонија и македонската музика, настана одамна во 60-тите години, кога јас бев мал, бидејќи јас сум офицерски син. Ние имавме еден грамофон, оној стариот, имавме многу плочи со најубавите македонски песни, со песните од Далмација, Хрватска, од Босна и Херцеговина, од Словенија, од Србија… И од таму таа моја љубов и кон Македонија и кон македонската публика – изјави Самарџиќ.

Иако не ги откри сите детали од предстојниот концертот во Скопје, сепак најави посебна вечер, исполента со многу љубов преточена во музика. Секако најави дека ќе има и гости, кои ќе останат изненадување за публиката.

– Тоа што македонската публика ќе има можност да чуе, тоа се некои нови песни, кои не сум ги изведувал сѐ уште во Скопје и секако некоја добра енергија со моите гости, се надевам дека од моите колеги приличен број ќе бидат слободни на тој датум. Во секој случај ќе дадам сѐ од себе тоа да биде уште една прекрасна, незаборавна моја македонска вечер, бидејќи Скопје конкретно, веќе одамна е една моја голема љубовна адреса – вели за Скопје и скопскиот концерт Жељко.

Тој е еден од милениците на македонската публика од сите возрасти, неговите песни се пеат во еден глас, а тој вешто умее да го препознае тоа и да ја пренесе својата емоција во сите негови хитови.

– Во студиото додека пеам и кога ќе ја почуствувам убавината на сето тоа, јас не дозволувам да се оди понатаму. Се прават повеќе снимки, па се монтира, се прават комбинации, но најубаво е тоа што прво ќе излезе од мене. Тоа е таа љубов која се препознава, бидејќи кога публиката ќе почувствува и кога ќе ти тргне од рака да го пренесеш своето чувство на оние кои те слушаат, тоа е тоа, нема што понатаму – вели Самарџиќ.

Повеќе од разговорот со Жељко Самарџиќ можете да погледнете на следниот линк: