Уметноста не познава граници, а современите уметници ја покажуваат својата креативност преку различни форми и медиуми.
На тој начин поголемо значење добиваат уметниците кои не се ограничуваат на една форма, туку ги комбинираат различните медиуми за да создадат нешто ново и автентично.

Еден од нив е Владимир Милиќ – Балдо, тату-артист и микс-медиа уметник кој ги поседува сите овие таленти и секојдневно ги комбинира за да создаде уникатни дела.

Милиќ дипломирал на Факултетот за ликовни уметности, а неговиот интерес за цртањето започнал уште пред 15 години, кога бил привлечен од маалските графити и уметноста што ја носат.

„Цртам графити, тетовирам и се занимавам со сè од креативен, илустраторски, уметнички карактер од 2007 година“, раскажува Милиќ за „Слободен печат“.

Тој е дел од многубројни проекти за цртање графити и мурали, како во Македонија, така и во странство, а пред неколку години започнал да се занимава со дигитална уметност и тетовирање.

Во интервјуто за „Слободен печат“, Милиќ истакна дека графити-културата, како и секоја друга форма на уметност, е сложена и често недоволно прифатена од јавноста, особено во контекстот на хаотичната реалност во Македонија.

Многумина го советувале да започне со тетовирање, но тој ни објасни дека тоа не било едноставно, земајќи го предвид фактот дека се работи за нечија кожа. Првично, тој бил скептичен, но по една посета на пријател од Ниш, каде што му било понудено да проба да тетовира, адреналинот и техниката го заразиле.

„Имав ситуација кога бев на гости кај мој пријател од Ниш, во Србија, Миња Нокс, и тој беше веќе ишаран цел, ме убедуваше да почнам да тетовирам“, ни раскажува Микиќ.

Во продолжение на интервјуто за „Слободен печат“, тој на креативците им истакна дека не треба да се угледуваат на трендовите на интернет за да создаваат дела.

„Не треба да се угледуваме на интернетот. Сите уметници од која бранша и да се, ако си креативен човек, немој да седиш на инстаграм… мрежата е направена за да ти го исцеди цел ендрофин што го имаш во тебе, да ти го убие чуството, потребата ти да створиш нешто“, предупредува Милиќ.