Што мислите, кој прави повеќе склекови – кошаркарската легенда Перо Антиќ или Сања Ристиќ, жената со илјада улоги? Ако мислевте дека одговорот е очигледен, размислете пак.

Во најновата епизода на „Слободно со Агнеса“, влеговме во домот на Перо Антиќ, поранешниот кошаркар и претседател на Македонската кошаркарска федерација, и неговата партнерка Сања Ристиќ, успешна маркетинг-менаџерка, сопственичка на компанија и кик-фит инструкторка.

Покрај разговорите за кариерата, семејството и предизвиците со кои се соочуваат, тие откриваат и една интересна домашна „расправија“ – кој прави повеќе склекови? Иако Перо важи за човек со спортска историја, и Сања е во одлична форма.

„Да бидам реална, во последниве две години, јас повеќе тренирам од Перо“, вели Сања, а Перо се согласи со неа и додаде дека ги сака „мрзливите вежби“ со кревање тежина, каде што не треба да се движи многу.
И двајцата се родители на момчиња, добиени со претходните брачни партнери – Сања има два сина, а Перо – три.

-Најстариот син наполни 18 години. Или станав млад татко или сега сум стар. Не знам како да се дефинира – вели Перо, смеејќи се.

Иако кариерата на Антиќ е исполнета со спортски успеси, во слободното време тој има едно сосема поинакво хоби. Наместо на кошаркарскиот терен, денес најмногу ужива во играње флипер.

-Јас си купив флипер и тоа ми е единствена занимација. Играв на ‘Плејстејшн’ до 2004 година, кога бев најдобар без конкуренција во играње ФИФА, а сега ме победуваат во секоја игра – па и во НБА. Сè уште ја чувам четворката, бидејќи ме има на таа игра и тоа ми е детско достигнување“, раскажа поранешниот кошаркар.

На прашањето „Кој е позабавен?“, Сања веднаш одговори: „Јас!“, а Перо за „мир во куќа“ се согласи со неа.
Исто така, Сања вели дека навистина ужива во работата на социјалните мрежи.

-Често добивам фидбек од следбениците на Инстаграм дека работите кои ги споделувам им помагаат. Многу ми е драго кога ќе видам дека, што и да сум споделила, некому помогнало. Затоа често знам да споделам и лични искуства, со цел да се изгуби онаа фама дека сè е совршено на Инстаграм – вели Сања.

-Станавме многу негативен народ. Но, за самите нас! За сите останати гости од страна сме најдобри, не постои подобар домаќин од Македонецот. Многу сме станати негативни – се радуваме само на успех, а не знаеме да дадеме поддршка кога ќе има неуспех-вели Перо.

Што се однесува до спортските афинитети на нивните деца, сите момчиња имаат љубов кон некој спорт.
„Постариот игра фудбал, а помалиот покажува афинитети за пливање“, рече Сања, а Перо кратко додаде: „Најстариот кошарка, средниот кошарка, а најмалиот – фудбал“.

На тема емоции, Перо смета дека мажите знаат како да ги скријат тогаш кога треба.

-Како што жена знае да биде цврста, не знам колку еден маж може толку емоционално да издржи. Жените знаат да се справат со емоциите и да вклучат и рацио. А маж, кога вистински има емоции, рациото може и да му клапне“, смета Сања.

Интересно е дека Перо е колекционер на телефони и го чува секој уред што некогаш го купил.

-Сега да ми дадеш телефон на „Самсунг“ нема да се снаоѓам, а со Ајфон знам како и при возење. Исто како со „Нокиа 3310“ на времето“, рече тој и ни ги покажа телефоните кои ги поседува.

Ова интервју донесе многу многу смеа и искрен разговор за животот зад камерите. Освен за спортот и семејството, Перо и Сања во интервјуто открија и каква музика слушаат, кои филмови најчесто ги гледаат и што најмногу сакаат да јадат заедно.