Славица Савеска-Кењереш е родена и израсната во Скопје, но последните 13 години живее во Осло, Норвешка. По образование е дипломиран економист, но нејзината професионална приказна започнува во новинарските води.

За „Слободен печат“ го сподели своето патешествие и авантурите низ кои поминува патувајќи по светот со семејството.

Судбината ги однела на нов животен пат. Со текот на годините, Славица и Александар основале семејство и денес се родители на две ќерки, на возраст од 10 и 4 години.

– Откако ја добивме првата ќерка, ни се разбуди желбата за патување, па оттогаш до денес, значи во изминативе десетина години, имаме 18 заеднички патувања во странство – објаснува Славица.

Поголемиот дел од нивните патувања биле во Европа, но посетиле и подалечни дестинации.

– Најчесто патуваме низ Европа, но еве, од подалечните дестинации сме биле двапати на Флорида во Америка, во Доминиканска Република, Египет, Маурициус, Тајланд. Од европските дестинации, дефинитивно Шпанија ми е прирасната за срце – додава таа.

Оваа година семејството од Осло тргнува во својата најголема авантура досега – деветмесечно патување низ седум земји од три континенти. Планот вклучува долги престои во Тајланд, Виетнам, Малезија, Индонезија, Филипини, Шпанија и неколкунеделна пауза во Македонија.

– Нашата патувачка авантура започнува од Осло, каде што живееме, и најпрво доаѓаме во Скопје на неколку недели да се видиме со блиските што секогаш ни недостигаат и секогаш недостига време поминато со нив. А од Скопје продолжуваме кон Тајланд и оттаму одиме во Виетнам, Малезија, Индонезија, Филипини – вели таа.

Савеска ни објасни дека нејзината најмала ќерка ќе направи пауза од градинка, додека постарата, која е во петто одделение, ќе следи настава преку homeschooling.

– Четиригодишната ќерка ќе добие една година пауза од градинка и мислам дека таа, oсвен тоа што знае дека ќе патуваме, не е премногу свесна за тоа што ќе се случува. Меѓутоа, поголемата ќерка навистина се радува и едвај чека да почнеме со патувањето. Таа е во петто одделение, така што за време на нашето деветмесечно патување, ќе го замени она нормалното регуларно училиште со homeschooling – објаснува таа.

Сместувањата за време на патувањето ги резервираат преку „Ербиенби“. Целта им е да се чувствуваат како да се дома, а не во хотел.

– Училишната клупа дефинитивно ја заменуваме со некоја друга атмосфера, можеби на плажа – вели Славица со насмевка.