Пред неколку дена во Зоолошката градина Скопје се појави птичји грип. Дали реакцијата на надлежните беше во ред? Дали сè беше спроведено онака како што налагаат правилниците? Дали треба да има период на инкубација? Дали е испочитувана цела процедура? Одговори на овие, но и на прашања околу вакцинацијата против сезонски грип и ковид, во утринската емисија „Слободен печат“ побаравме од проф. доктор Драган Даниловски, епидемиолог.

– Имавме прилика да доживееме и Х5N1, тип А на птичиот грип, тоа е таканаречен високопатоген сој којшто предзвикува голема смртност кај птиците, ама и кај луѓе ако  дојде до инфекција. Имавме прилика да се соочиме и со такво нешто, имаше реакција, па се замеша политика, па се искористи настанот да се тријат раце од одредени политички субјекти, да се ќарат некакви политички поени. Се создаде една вознемираност кај луѓето, се кренаа на нозе заштитници на животните, па тужби се најувуваа од Зоолошка градина. Вистината е дека според правилникот за спроведување мерки за сузбивање и искоренување на авијарна инфлуенца, постапено е онака како што треба – вели Даниловски.

Тој вели дека од страна гледано изгледа драматично, но постапката е испочитувана. Ако не се постапело според правилник може да се нанесе голема штета за живинарската дејност во државата, да се рашири болеста.

– Ако грипот се пренесе во живинарските фарми, тука нема милост, повторно мора комплектно да се уништи целиот птичи фонд. Франција има такво лошо искуство, милиони пилиња се уништени таму години наназад, па сега тие преминаа први во светот на вакцинација на живината. Болеста се јавува меѓу животните и многу тешко се пренесува на луѓе. За да заболи некој мора постојано да е во контакт со болни животни – вели докторот.

За споредба, вели, од 2003 година до август 2024, во цел свет, во 23 земји, пријавени се 896 случаи на авијарна инфлуенца кај луѓе, од нив 463 починале.

– Болеста многу тешко се пренесува. Сите случаи што во светот се јавиле, се јавиле заради тоа што се манипулирало со живината или со птиците, диви или питоми, без какви било заштитни средства. Болеста се пренесува преку контакт со респираторниот секрет од животните, плунка од животните, измет, крв, месо и контаминирани предмети. Меѓутоа, треба да бидат изводредно интензивни контактите на човек со овие извори за да дојде до заразување – вели Даниловски.

Околу сезонскиот грип докторот вели дека е многу несигурно или тешко да се направи разлика меѓу обична настинка, особено ако е блага клиничка, грип и ковид-19.

– Многу е тешко да се претпостави од што боледува пацинетот ако не развие симптоми. Кај грипот има болки во телото, болка во мускули, изразена малаксаност, слабост. Кај настинките нема болка и висока температура. Кај ковидот се јавува и симптом загуба на вкус и мирис. За да се утврди од што точно боледува пациентот мора да се направи тестирање – вели Даниловски.

Во врска со вакцинацијата вели дека треба да се вакцинираат деца до пет години, но само за сезонски грип, ковидот не е опасен за нив.

– Сезонскиот грип може да биде многу опасен за мали деца бидејќи предизвикува бронхопневмонии, па дури и енцефалит, воспаление на мозокот, ако се искомплицира. Да сум млад родител, не би се коцкал со здравјето на детето. За возрасните вакцинацијата за сезонски грип е по избор. Светската здравствена организација препорачува вакцинирањето против ковид-19 да оди аналогно како вакцинирањето против сезонскиот грип, еднаш годишно – вели Даниловски.

За младите вели дека е добро да се дружат што повеќе за да бидат изложени на повеќе вируси и така да го одржуваат имунитетот на високо ниво.

– Ги охрабрувам да се дружат и да се настинуваат што повеќе. Повременото изложување на респираторни вируси е влог во силен колективен имунитет. Еден вид бустирање, бустер дози на имунитет му обезбедуваме на организмот – вели докторот.

За постарите освен вакцинација препорачува и редовно носење на маски, посебно во затворени простории каде што има гужви.