ВИДЕОИНТЕРВЈУ | Ниновски: „Умниверзум“ може да замени приватни часови по математика
„Умниверзум“ е новата алатка направена со помош вештачка интелигенција наменета за подобрување на математичките вештини на средношколците. Овој тутор е бесплатен и би заменил скапи приватни часови по математика, вели за „Слободен печат“ Петар Ниновски, основач и извршен директор на „Бреинсетр“.
Препорачано
-„Умниверзум“ е за сите средношколци од државава. Овде може да вежбаат задачи, да решаваат тестови, да им помогне за домашните задачи, може да направат дури и симулација на матурски испит. Имаме информации за сите матурски испити по математика, што ги решавале средношколците во последните 15 години. Туторот е усовршен така што може да му дадат насоки тој да им задава задачи. Тој полека ги учи способностите на средношколците– вели Ниновски.
Со цел да го привлечат вниманието апликацијата ја направиле многу едноставна, но и забавна, средношколците преку натпреварувачки дух собираат поени и знаење.
Ова нема да им пречи во работата на професорите, додава Ниновски, туку напротив треба да им помогне. Но дека можеби некое дете ќе сака да ја злоупотреби не негира.
-Дали ќе има случај средношколец да го слика тестот и алатката да му го реши целиот тест?! Тоа не можеме да негираме дека ќе се случи, бидејќи веројатноста е голема дека ќе се случи. Но, нашата цел е да направиме нешто со позитивен ефект. Во иднина сакаме да направиме модули коишто професорите по математика од средните училишта ќе може да ги користат за задачи, за прегледување на тестови. Замислете да може оваа алатка да им го намали времето посветено на мануелна работа и наместо тоа да можат професорите да се фокусираат повеќе на работа со средношколците. Ако се сеќавате пред десетина години кога се измисли онаа алатка за шах, што таа година ги победи сите шампиони за шах. Меѓутоа, знаете што се случи понатаму по измислувањето на алатката? Шампионите кои ја користеа алатката станаа многу подобри во шах. Значи, тие не се испалшија од неа туку одбраа да ја користат за вежбање понатаму. Таков ефект очекуваме и со „Умниверзум“ – вели тој.
Ниновски очекува оваа алатка да ги подобри резултатите на нашите ученици на ПИСА тестирањата, кои во последните години ни носат разочарувачки резултати.
