По повод прославата за 20 години од основањето на Српскиот културно-информативен центар СПОНА, разговаравме со претседателката Наташа Станчиќ за значењето на овој јубилеј и културната мисија што центарот ја гради веќе две децении.

Јубилејот ќе биде одбележан со концертот „Шлаг шлагери – Ко некад у 8“, кој ќе се одржи на 22 јуни (недела) во 20:30 часот, на платото пред Македонскиот народен театар, во рамки на фестивалот Скопско лето. Оркестарот „Полифонија“ ќе изведе безвременски евергрини од регионот, а на сцената ќе настапат етаблирани македонски музичари, како Вера Јанковиќ, Андријана Јаневска, Ана Петановска, Маја Панчева, Денис Димовски и други, а специјален гостин од Србија ќе биде оперскиот пејач и универзитетски професор Оливер Њего.

– За почеток да кажам зашто „Шлаг шлагери“. Во ова прилика сакам да изразам огромна благодарност на Уметничкиот центар „Полифонија“, кој навистина ни помогна да одбереме дел од композициите, кои сметаме дека најдобро ќе ја разиграат летната атмосфера. Беше исклучително тешко да се направи еден времеплов, бидејќи има премногу прекрасни и убави композиции и мелодии, меѓутоа не се сите соодветни за настанот, ниту пак може да ја одржат атмосферата. Кога ќе добиете ветер во грб од вакви искусни професионалци, тогаш работата оди полесно. Нормално, тука е партнер и Скопско лето, ова е вториот ден од отворањето на фестивалот, кои се обидуваат да го вратат својот стар и препознатлив сјај. Навистина, оваа година и покрај скромниот буџет, се обидоа да направат едно навистина интересно културно-уметничко лето во главниот град. Ние сме тука да им дадеме поддршка со „Полифонија“ и СПОНА за вториот ден од отворањето да направат еден ваков гламурозен настан. И во најавите велиме дека тоа е нешто, што е урбано, културно и дека е она Скопје што на сите по малку ни недостасува, со тој градски шмек, со развигорецот покрај Вардар, во една пријатна опуштена квечерина со симфониски оркестар. Важно е да се нагласи дека за изведувачите меѓу кои се Маја Панчева, Андријана Јаневска, Денис Димовски, Ана Петановска, а тоа се познати имиња, направени се посебни аранжмани, приспособени за нив и за оркестарот кој ќе свири во живо, а оркестарот го сочинува 20 врвни уметници од Македонската опера и балет, и затоа мислам дека задоволството ќе биде загарантирано – вели Наташа Станчиќ.

Погледнете го интервјуто на Јутјуб каналот на „Слободен печат“, каде Станчиќ открива детали за настанот, за досегашната работа на СПОНА, но и за улогата на културата како мост помеѓу народите.