Кај народот има скептицизам од сработеното во првите 100 дена од Владата, но не треба да се заборави дека сè уште не е завршена трансформацијата на многубројни функционерски позиции и можеби затоа се доцни со некои одлуки, кои се очекуваат од новата коалиција, смета аналитичарот Љуљзим Фаризи.

Во утринската програма на „Слободен печат“, тој посочи дека бавно оди со промената на кадрите во дел од институциите.

– Многу од директорските места се непроменети и затоа не можеме да направиме вистинска процена на тоа што е сработено. Но, не треба да се заборави дека претходната Влада имаше секој ден по еден скандал. Сега имавме гафови со Африм Гаши, но тоа не беа скандали какви што навикнавме од времето на СДСМ и на ДУИ. Иако јас веднаш реков дека во случајот на Гаши, тој мораше да си поднесе оставка на функцијата претседател на Собранието поради сите говори што ги приреди. Но, постои огромна разлика помеѓу криминал и гафови – смета Фаризи.

Што се однесува до функционирањето на владината коалиција, тој смета дека на моменти се случува како ВМРО-ДПМНЕ и Вреди да водат различни политики.

– Не може едната партија да води една политика, а другата да води поинаква политика. Тоа е непринципиелно – вели тој алудирајќи на фактот дека при посетата на српскиот премиер Милош Вучевиќ, ниту еден од функционерите на Вреди не беше присутен на приемот организиран во негова чест.

Што се однесува до тврдењето на поранешниот лидер на СДСМ, Димитар Ковачевски, тој изјави дека поради мешањето на косовскиот премиер Албин Курти во нашиот изборен процес, неговата партија ги изгубила изборите. Да потсетиме, Курти помогна при обединувањето на албанските опозициски партии, што беше карактеризирано како пречка за формирање предизборна коалиција меѓу СДСМ и ДУИ.

– Тоа е повеќе борба на релација Тирана и Приштина, односно политичка борба на Еди Рама и Албин Курти. Инаку, Европскиот фронт со кој ДУИ настапи на изборите, всушност беше подготвен за СДСМ. Точно е и дека со интервенција на Курти, албанската опозиција се обедини во коалицијата Вреди – истакна Фаризи.

Тој не е преголем оптимист дека Вреди ќе успее долго време да се задржи на власт, но порача дека е дојдено крајно време Албанците во Македонија да формираат нова политичка партија, која на поинаков начин ќе им пристапи на проблемите.

– Младите луѓе од албанскиот народ во Македонија мора да формираат нова политичка партија, во која ќе нема кадри од партиите што досега функционираа во политиката – додаде Фаризи.

Целото интервју со нашиот гостин проследете го на следниот линк: