Ние имаме добри закони, но не се спроведуваат. Во носењето на деталните урбанистички планови, учествуваат разни чинители од општеството, место исклучиво тоа да бидат компетентни луѓе од градежната фела. Така, имаме еден голем урбанистички хаос дополнет со дивоградби кои се кривично дело, но за жал во државата царува неказнивост, вели Ивица Јакимовски, претседател на Градежната комора при Сојузот на стопански комори, кој гостуваше во Слободен печат ТВ.

Тој не носи ни оптимистички вести за купувачите на станови и потенцира дека понудата е помала од побарувачката, а постојат и други фактори кои влијаат на цената на становите.
– Тоа што ние сме имале недвижност со достапна цена, да не кажам многу поевтина, тоа било привилегија – вели Јакимовски.

Од друга страна, Јакимовски укажува на она што сите можеме да го видиме – урбани места што ни оддалеку не се пријатно место за живеење. Примери има многу, па и такви каде што соседите од спротивни згради може да си подадат кафе преку тераса.

– Резултатот на носењето детални урбанистички планови во одредени делови од градот е тотален хаос, а тоа е резултат и на незнаење, но веројатно и на одредени лични интереси и цели. Во носењето на деталните планови не се само луѓе од градежната фела, туку се влезени и луѓе од сите сфери, па носењето на деталните планови не е врз основа на стратегија – во кои насоки треба да се движиме, во кои насоки треба да бидат генералените планови. Преку носење генерални планови се утврдуваат параметрите на кој дел и колку може да се гради. Преку разработка на планови од понизок ранг, какви што се деталните, се утврдува точната намена и цел: што треба да се добие. Но, имаме и постари и понови детални планови каде што не може да се задоволат основните параметри во однос на оддалечување на еден до друг објект, во однос на хортикултурни уредувања, димензионирање на паркови, училишта, градинки… – вели Јакимовски.

Тој објаснува дека кога нешто ќе се изгради, приказната е готова. Треба да се интервенира додека се носат плановите, а за тоа има повеќе фази во кои се вклучени разни институции.

Јакимовски се согласува дека Скопје треба урбанистички да се шири, но укажува дека засега нема услови, ниту има планови, ниту соодветна инфраструктура.

– Познато е дека во големите европски градови не може да се гради. Но, додека ние имаме неизградени локации, ќе се гради. Сакаме да градиме и периферно, но ни треба инфраструктура и стратегиско планирање за наредните 50 или 100 години – потенцира претседателот на Комората.

Во меѓувреме, во Скопје, особено во центарот и во населбите што гравитираат околу центарот се бара парцела повеќе.

– Имаме повеќе влезни параметри што ја определуваат цената на становите. Во сегашната ситуација, ако за една градежна локација во минатото оделе 25 проценти од нето изградената површина за сопствениците, или за сопственикот, сега се случува во централно градско подрачје да одат 35-40 проценти од вкупната градба. Тоа е резултат на немање доволна понуда на локации – вели Јакимовски.

Како други фактори што ја определуваат цената, Јакимовски вели дека тоа е цената на трудот и на градежните материјали.

Градежната комора, вели Јакимовски, се спротивставува на секакви обиди за легализација на дивоградбите. Кај нас имаше повеќе обиди за легализација на бесправно изградените објекти, иако Македонија спроведе голем процес за легализација, но во меѓувреме се изродија нови дивоградби!

– Дивоградбите се катастрофа и по однос на начинот на живеење. Самите дивоградби не се изградени во контролиран процес – немаат основен проект, нема одредени ревизии, немаат поминато во ИЗИС, немаат добиено никаква согласност за приклучок. Ако во Законот точно пишува како треба да се гради, а ние имаме дивоградби, тогаш треба да се запрашаме каде ние се наоѓаме? Гледано од призма на Градежната комора, како компании кои учествуваат во изградба на објекти согласно утврденото во закон, во ниеден случај не можеме да поддржиме да се носи закон за легализација. Со носење на секој еден нов закон за легализација, ние имаме стимулација на дивото градење. Кога одредено дело е неказниво, ќе ни се случуваат дивоградби – вели Јакимовски.

Јакимовски алармира дека градежниот сектор е многу сериозна гранка, потсетува дека сè околу нас е резултат на градење, како и дека тој придвижува уште 27 индустриски гранки.

– Апсолутно тврдам со целиот свој интегритет дека имаме капацитет да реализираме каков било објект што постои во нашава држава. Тоа што е изградено, е изградено од нас, не ни дошол некој претходно да ни гради. Но, за да имаме кадар, треба да имаме континуитет, пред сè во реализација на посложени инфраструктурни објекти. Развој на еден градежен инженер и архитект е исклучиво преку учество на проекти – вели Јакимовски.

Целото ВИДЕОИНТЕРВЈУ погледајте го во продолжение: