Иницијативата „Ретвитни оброк“ е граѓански проект од Скопје кој веќе речиси 10 години се залага за намалување на фрлањето на храна и за обезбедување оброци и намирници за социјално загрозените и бездомни лица во Скопје. Секој петок, група волонтери се собираат заедно и подготвуваат оброци кои потоа се доставуваат до оние кои најмногу имаат потреба.

Оваа иницијатива не само што им помага на најранливите во нашето општество, туку и создава мрежа на солидарност и волонтеризам во која се вклучуваат сите, без разлика на возраст, етникум или социјален статус.

Кристијан Калинов, еден од активистите на „Ретвитни оброк“, за „Слободен печат“ објаснува дека оваа иницијатива започнала на многу едноставен начин:

– Иницијативата почна пред околу 10 години, многу наивно, кога две девојки решиле еден викенд да се приклучат на здружението „Љубезност“ и да подготват десетина оброци кај нив дома. Тие споделиле на Твитер, сакале некој викенд да готват со нас, да ретвитнеме или да споделиме некој оброк. Наредната недела се приклучија уште некои луѓе и по некоја недела, дознав и јас за тоа, па се приклучив и јас.

Со текот на времето, иницијативата се проширила и добила широка поддршка. Денес, секој петок се подготвуваат помеѓу 120 и 150 оброци, а секојдневно се обезбедуваат намирници благодарение на донациите на луѓето кои сакаат да учествуваат во готвењето и да донираат храна. Оваа иницијатива има и голем импакт кај младите.

Овој пат присустуваа студенти од Универзитетот „Мајка Тереза“, кои дојдоа да подготват храна, наместо да присуствуваат на настава, како и да научат што значи да се биде солидарен и да се помогне.

– Секој петок, различна група што доаѓа, најчесто ги обезбедува намирниците што ги користиме за готвење. И доаѓаат луѓе буквално од секој слој, секој етникум, секоја возраст. Сега имаме студенти од универзитетот „Мајка Тереза“ – додава Калинов.

Проектот не се базира само на волонтерска работа, туку и на соработка со различни организации, луѓе и фирми кои донираат. „Ретвитни оброк“ има долгорочна партнерска соработка со граѓанското здружение „Љубезност“, кое им помага на волонтерите да ги достават оброците до најранливите групи.

Калинов за „Слободен печат“ објасни дека иницијативата започнала скромно, но денес е доказ дека малите акции можат да имаат големо влијание.