Се прави ли магнетна резонанца на срце? Колку трае? Кои болести се откриваат со магнетната резонанца? Дали таа воопшто се прави во Македонија? Утрово во утринската емисија „Слободен печат“ одговор побаравме од доктор Ивана Јовановска Христова, специјалист по кардиологија од приватната болница „Аџибадем Систина“. Докторката вели дека оваа процедура е релативно нова, а заживува на нашите простори. Има задоволителни резултати коишто носат корист за пациентите.

– Ултрасонографијата е основа, а самиот ординирачки кардиолог врз основа на наодот одлучува дали следниот чекор е магнетната резонанца. Таа е специфична и посебна само заради тоа што го дава квалитетот на ткивото. Пациентите влегуваат во една бела, огромна цевка во којашто е поставен магнет, тој магнет не го гледаат, ниту пак го чувствуваат. Нам тоа ни прикажува јасна слика која ја поистоветуваме со одредена дијагноза или болест – вели Христова.

Таа објаснува дека магнетната резонанца е неинвазивна, безбедна за болните и не користи зрачење. Процедурата трае од 30 до 60 минути, со тоа што има претходна подготовка.

– По приемот, имаме четири зони низ кои се спроведува пациентот, со тоа што имаме безбедно сликање или безбеден имиџинг. Не постои контраиндикација, но сепак сме внимателни во тој поглед. Магнетната резонанца на срце е златен стандард за процена на присуство на волумен на крв во срцевите шуплини и за добивање на процентуално изразена пумпна сила. Затоа, кога пациентите ме прашуваат: Колку проценти ми работи срцето?, тоа го одредува магнетната резонанца – вели Христова.

Таа објаснува дека доколку станува збор за тумор, најчесто се гледаат секундарните последици, коишто се презентираат како мозочен удар, загуба на свест, пад, повреда.

– Карцином на срце се лекува со тоа што тој се отстранува хируршки. Но има некои тумори кои, доколку се минимални или станува збор за израстоци во телото, ние ги следиме и некогаш тоа го правиме на шест месеци до една година. Особено што туморите или овие состојби не бираат возраст. Може да станува збор за некој млад адолесцент, па сè до некој многу возрасен пациент – вели Христова.

На прашањето кој го чита резултатот од магнетната резонанца, радиолог или кардиолог, таа вели дека тоа е тимска работа од која произлегува заклучок, а тоа е дијагноза и дел до излекувањето.

– Срцевата слабост денес е израмнета со онколошките болести. И самите термини кои ги користиме, како на пример дека пациентот е „во ремисија, во подобрување“, буквално се поистоветуваат. Некогаш луѓето ги губиме и кога биле на нога, биле многу активни, ги губиме во сон. Едноставно, никогаш не се будат. А најпоразително е кога гледаме спортски натпревар, а некој од играчите ќе почине на терен. Затоа е потребна контрола и дијагноза – вели докторката.

На прашањето дали се случува пациентите да ги гледаат малку со недоумица кога им кажуваат дека може да се направи магнетна резонанца на срце, Христова вели дека тоа се случува скоро секогаш.

– Треба време да заживее методот, да се навикнеме, бидејќи се прашуваат како е можно на срце да се прави исто снимање како на колено, на пример. Тука мора ние пластично да го објасниме тоа, како и што ќе добиеме од магнетната резонанца, која е користа. Бенефитот е огромен со тоа што добивате комплетен заклучок од процедура којашто е апсолутно безбедна за вас, и дефинираме одредена состојба со тоа што не само што добивате дијагноза, имаме и цел на лекување – вели Христова.

Таа вели дека доколку пациентите имаат синкопа, загуба на свест, доколку имаат болка во градите, се заморуваат, имаат „глад за воздух“, да се јават на еден базичен преглед, макар и кај матичен лекар да направат еден електрокардиограм.