Вкупно 45,4 отсто од населението во Македонија се пушачи. Најактивни се оние од 34 до 55 години (55 отсто). Кај македонската популација жените пушат повеќе, а меѓу Албанците тоа се мажите. Од пушење досега се откажале 15,6 отсто, а 39 отсто од населението никогаш не запалиле цигара.

ИЈЗ неодамна отвори линија за откажување од цигари. Од таму велат дека редовно ѕвони телефонот во Центарот за откажување од пушење при ИЈЗ. Интересот не е мал како за почеток, вели за „Слободен печат“ д-р Марија Андоновска, директорка на ИЈЗ.

– Мора од некаде да се почне, висок е процентот на пушачи во нашата земја. Нашата цел е да ги охрабриме и мотивираме оние што еднаш ќе го завртат овој број, да бидеме упорни и доколку се колебливи да не им дозволиме да се откажат. Задоволни сме за тоа како досега се развива ситуацијата, за овој краток период откако ја пуштивме линијата во функција имаме редовно повици. Загрижува тоа што 72 отсто од населението никогаш не пробале да се откажат, а 53 отсто велат дека нема никогаш да пробаат да ги остават цигарите. Ова нас не нè демотивира, продолжуваме понатаму во нашата мисија – намалување на бројот на пушачи – рече Андоновска.

Недостигот на државна стратегија и програма нè вивна меѓу најпушачките нации во Европа, според Андоновска, резултатите од истражувањата на ИЈЗ треба да претставуваат основа за во иднина државата да спроведе некакви посериозни практики.

Цената на цигарите и здравствените проблеми се главни причини коишто ги тераат пушачите да кажат стоп за пушењето.

– Институтот треба да има влијание врз здравствените политики. Статистиките што произлегуваат од нашите истражувања треба потоа да се преточат во некакви програми – вели д-р Андоновска.

Свеста за штетното влијание што го имаат цигарите е голема, на анкеката 89,7 отсто одговориле дека ги разбираат последиците по здравјето од консумирањето цигари.

Доколку сакате да се откажете од цигарите, а потребна ви е психолошка поддршка од стручни лица, обратете се на телефонскиот број 078 285 873 секој понеделеник и среда од 11 до 13 часот.

Македонија е рекордер по пушење во Европа, а според Светската здравствена организација пушењето е една од водечките причина за зголемената смртност во последните години. Во светот годишно поради пушење умираат околу 7.000 луѓе, а кај нас тутунот е втора причина за смрт од кардиоваскуларни заболувања кои годишно земаат по околу 15.000 животи и е главна причина за рак на белите дробови, наведуваат пулмолозите.