По бурните реакции на дел од корисниците на социјалните мрежи, за тоа што новиот собраниски спикер Африм Гаши, на заклетвата прво се обрати на албански јазик, „Слободен печат“ излезе на терен и ги праша случајните минувачи каков став имаат околу ова и дали следат политика.

Поголемиот број од анкетираните ни одговорија дека не ги интересира политиката и дека имаат „попаметна работа“.

– Имам многу работа, немам време да следам политика – одговори една млада девојка пред нашата камера.

Според една скопјанка, политиката е здодевна во последно време, не се случува ништо интересно за да ја следи.

Дел од нив, пак, одговорија дека не би требало да зборува на албански јазик.

– Сите политички состаноци, обраќања… според мене треба да се спроведуваат на официјалниот јазик на државата, а тоа е македонскиот, албанскиот треба да биде почитуван, но административните работи треба да бидат спроведени на македонски – рече еден млад скопјанец.

Граѓаните велат дека секоја политичка партија која не се согласува со однесувањето на Гаши требало да реагира. Според дел од прашаните и претстедателката требало да реагира, а едно младо момче рече дека во вакви ситуации и граѓаните не треба да молчат.

Неколкумина од анкетираните ни одговорија дека треба да се стремиме кон здраво мултиетничко општество.

– Секаде во светот каде што има мултиетничко население тоа е сосема нормално, јас немам никаков проблем со тоа. Ако се делиме етнички, нема никаде да стигнеме – одговори младиот скопјанец пред камерата на „Слободен печат“.

Целата анкета  на колешката Агнеса Чаволи погледнете ја во продолжение: