Разгранет синџир за измами со инвестиции во криптовалути, преку кој властите велат дека се испрани повеќе од 460 милиони евра (540 милиони долари) од повеќе од 5.000 жртви ширум светот преку меѓународна мрежа на соучесници, е разбиен во Шпанија, соопшти Европол во понеделник.

Операцијата ја координирале шпанските власти, со помош на полициските сили од Франција, Естонија и САД, соопшти Европол. Вкупно пет лица се уапсени во координираните истраги – три на Канарските Острови и две во Мадрид.

Според извештаите, синџирот користел десетици партнери низ целиот свет за да собира пари преку подигање готовина, банкарски трансфери и трансфери на криптовалути.

Истражителите се сомневаат дека сторителите поставиле сложена корпоративна и банкарска мрежа со седиште во Хонг Конг, користејќи платни системи и кориснички сметки на имиња на разни поединци и на различни платформи за менувачници за да примаат, складираат и префрлаат нелегални средства.

Европол нагласи дека истрагите се уште се во тек.