Македонскиот пејач Васил Гарванлиев неодамна се вери во Америка, а како што изјави за забавната емисија „Бекстејџ“ – со неговиот избраник се препознале „на прва“, а го освоил со едноставноста и со анонимноста.

„Дојдов во Америка за да го создадам албумот, но ми се случи љубов. Тој ме освои со искрениот поглед, не знаејќи кој сум. Многу често кога одам на средба, ако некој не ме знае – нема шанси да ти запејам. Тој немаше поим за ништо во врска со мене и тоа ми беше важно.“

На прашањето дали досега му се случило потенцијалните партнери да го сакаат поради неговата успешност во кариерата, Васил вели – да.

„Да, ми се случило многупати. Но, ова искуство беше единствено бидејќи беше т.н. ‘двосмерна улица’. Чувствата ни беа сѐ. Ако верувам во нешто, тоа е љубовта. Сум имал многу искуства, и убави, и неубави, но за ова веднаш знаев дека е нешто вистинско.“

Васил откри дека неговиот партнер не е Македонец, но и дека за еден месец ќе дојдат во Македонија. Исто така, сподели и дека е прилично спиритуален и дека верува во тоа дека на некој начин ја манифестирал оваа љубовна приказна во неговата реалност.

„Тие кои ме знаат, знаат дека сакам медитации и манифестации. Кога сакам нешто да ми се оствари, многу често ја запишувам мојата желба. Имав еден многу специјален момент во Централ парк во Њујорк, кај фонтаната Бетезда со скулптурата ‘Ангел на водите’, каде се сеќавам дека легнав на една од клупите и си реков: ‘Во следните три години, го посакувам тоа, тоа, тоа…’ Tаму се најде Евровизија, албум, љубов итн.

Имам едно видео од една другарка, која ја организираше целата ситуација со него. Како што седнавме на клупата, немам идеја што ме натера да се свртам и да погледнам на десно, ја видов неа дека е качена на клупата и дека снима. Таа само ме виде дека се свртев и ми рече да не се вртам. И сфатив… си реков – еве ја мајката. И така бидна.“

Првиот човек од семејството на Васил кој ја дознал среќната вест е неговиот брат.

„Тие ми рекоа да ѝ се јавам на мајка ми, но јас одлучив прво да му се јавам на брат ми. Мирно реагираа, но на некој начин беа шокирани бидејќи сѐ уште го немаат запознаено. Но, ќе се запознаат.“

Што се однесува до свадбената церемонија, пејачот рече дека сѐ уште не ги знаат сите детали, но дека ќе има простор и за македонските обичаи.

„Сѐ уште не ги знаеме тие работи, но сигурно ќе има оро. Немам поим каде ќе биде свадбата, веројатно насекаде. Имам живеено насекаде и го имам тоа одбрано семејство. Не знам дали ќе одбереме дестинација, па сите да дојдат таму – ќе видиме.“

„Вон ѕидовите”: Васил Гарванлиев, Туна, Фифи и Зоки Бејбе со добра музика ја поддржаа Парадата на гордоста