Виљареал направи изненадување во 28 коло од Ла Лига, откако на „Сантијаго Бернабеу“ го совлада фаворизираниот Реал Мадрид по пресврт со 3:2 и со тоа најверојатно „кралевите“ ги губат шансите за шампионската титула.

Откако не успеа да го стори тоа на теренот, нервозниот Федерико Валверде реши да му се одмазди на играчот на Виљареал, Алекс Баенa по натпреварот за скандалозниот коментар што му го даде за време на натпреварот што овие тимови го одиграа пред неколку месеци во Кралскиот куп.

Имено, на мечот кој овие екипи го одиграа во јануари по жестокиот старт над Валверде, Баена даде срамен коментар – ја прозва сопругата која имаше спонтан абортус: „Плачи сега кога знаеш дека твојот син нема да се роди“.

Валверде не го заборави тоа. Тој чекаше одмазда и наводно пред денешниот натпревар јасно му рекол: „Не заборавив што ми кажа“.

Се обиде да му врати на теренот, а бидејќи не му успеа, реши да го направи тоа по мечот, па го чекаше на паркингот пред автобусот.

Тој наводно го удрил со тупаница во главата, а потоа му рекол: „Не допирај го моето семејство“.

Фудбалерите на Виљареал наводно го снимиле инцидентот од автобусот. Иако имале намера нападот да го пријават во полиција, тоа на крајот не се случило.

Претставникот на Виљареал, Ксиско Надал по мечот на Твитер напиша дека Валверде е „кукавица“. Но набрзо потоа ја избриша својата објава. Судејќи според зборовите на сведокот, на лицето на Баена јасно се гледаат трагите од жестокиот удар што му го нанесе Уругваецот.