По осум години во Ливерпул, бразилскиот фудбалски репрезентативец Роберто Фирмино (31) кариерата ќе ја продолжи во Ал Ахли, соопштија од саудискиот клуб.

Бразилецот е второто големо засилување на новиот саудиски прволигаш Ал Ахли по доаѓањето на поранешниот голман на Челси, Сенегалецот Едуар Менди.

– Отсекогаш сум играл за големи тимови, сега сум во Ал Ахли – изјави Фирмино во видеото на клупскиот профил на Твитер.

Фирмино ја започна кариерата во Фигуеиренсе, а во 2011 година се пресели во Хофенхајм каде остана четири години. Потоа за „црвените“ настапуваше осум години, забележа 362 настапи и постигна 111 голови. Со Ливерпул освои седум трофеи, вклучувајќи ги Лигата на шампионите (2019) и Премиерлигата (2020). За бразилскиот тим одигра 55 натпревари и постигна 17 голови.

Firmino is Ready! ???

pic.twitter.com/Kdr4zMo0X1

— Al-Ahli Saudi Club (@ALAHLI_FCEN) July 4, 2023

Тој без надомест пристигна во клубот од Џеда, потпишувајќи договор на три години.

Фирмино е последниот во низата фудбалски ѕвезди кои се преселија во саудиски клубови. Сигурно најпознат трансфер беше трансферот на Кристијано Роналдо од Манчестер јунајтед во Ал Наср. Потоа дојдоа Карим Бензма, Марсело Брозовиќ, Н’Голо Канте, Рубен Невес, Калиду Кулибали, тренерот Стивен Џерард…