Поранешен украински полицаец, идентификуван со иницијалите А.А.И., денеска ја прескокнал заштитната ограда на надвозник над тунелот „Таксим“ во центарот на Истанбул, и се заканил дека ќе се фрли на коловозот во знак на протест против војната, јавија локалните медиуми.

На снимка објавена на социјалните мрежи се гледа како Украинецот се движи на просторот пред заштитната ограда, додека полицијата го запира сообраќајот. Пожарникарите превентивно поставиле душек на надувување под надвозникот.

Според очевидци, човекот бил очигледно пијан и на англиски јазик извикувал „Стоп за војната“.

По двочасовни тензии, полицијата успеала да го убеди Украинецот да се симне и го привела, јавуваат медиумите.