Фудбалерите на Тотенхем слават, играчите на Манчестер јунајтед тагуваат. Во финалето на Лига Европа одиграно во Билбао, Шпанија, Тотенхем триумфираше со 1:0 на „Сан Мамеш“. Претходно Тотенхем уште двапати го освојуваше натпреварувањето во 1972 и 1984 година тогаш под името Куп на УЕФА.

Менаџерот на победничкиот тим, Анге Постекоглу, ги избриша сите проблеми од оваа сезона, Тотенхем ќе игра во Лигата на шампионите следната сезона и ќе биде шестиот клуб од Премиер лигата во елитата.

Во фантастична атмосфера создадена од навивачите на двата клуба, во англиското финале видовме темпо, интензитет, брзина, но и некои грешки што предизвикаа можности.

Тотенхем имаше две шанси да поведе во првите 15 минути, но Онана беше на висина на задачата. Јунајтед се разбуди, се закани преку Амаду Дијало и Бруно Фернандеш, но без никаква завршница.

И кога се очекуваше првото полувреме од натпреварот да заврши без голови, Бренан Џонсон, по грешката на Лук Шо, успеа да ја смести топката во мрежата, на задоволство на навивачката база на Тотенхем.

Јунајтед мораше да ризикува повеќе во понатамошниот период од мечот. „Црвените ѓаволи“ напаѓаа со сите сили кон голот на Викари, ја имаа топката во посед, но Тотенхем успешно се бранеше и вешто ги затвори сите приоди, чекајќи шанса за противнапад и во таква можност се најде во 62 минута кога Соланке, во ситуација „два на еден“, лошо го прими додавањето на Удоџи и не реализираше зицер.

А потоа Тотенхем имаше среќа бидејќи кардиналната грешка на Викарио беше одбранета од Мики Ван дер Вен. Хојлунд ја испрати топката со глава кон мрежата откако голманот ја испушти, а холандскиот дефанзивец успеа да интервенира со акробатски „ножички“.

Бруно Фернандеш можеше да израмни бидејќи беше сам на седум или осум метри оддалеченост и шутираше со глава покрај голот, што можеби беше првата поголема грешка на одбраната на Тотенхем. Натпреварот се играше само на половината на Тотенхем, Јунајтед направи „безброј“ центрирања, но ниту еден од нив не го најде патот до противничката мрежа.