Њујоршкиот свештеник кој ѝ дозволил на Сабрина Карпентер да го сними спотот за „Feather“ во неговата црква, доби отказ оваа недела. Монсињорот Џејми Џигантиело е разрешен од „секаков пасторален надзор или раководна улога“ во црквата Благовештение на Пресвета Богородица во Бруклин, пишува „Би-би-си“.

Службениците на црквата започнале истрага по објавувањето на музичкото видео во октомври 2023 година за хит песната на Карпентер, „Feather“, снимена во црквата Пресвета Богородица.

Епархијата соопшти дека покрај музичкото видео што ги згрози некои, истрагата открила други случаи на лошо управување, вклучително и неодобрени финансиски трансфери.

Свештеникот (65) добил отказ поради обвинувањата дека префрлил 1,9 милиони долари црковни средства на поранешниот шеф на кабинетот на градоначалникот на Њујорк, Ерик Адамс.

„Жал ми е што морам да споделам дека истрагите спроведени од Алварез и Марсал и Саливан и Кромвел ЛЛП открија сериозни прекршувања на епархиските правила и протоколи во црквата Благовештение на Пресвета Богородица во Бруклин“, рече бискупот Роберт Бренан во изјавата објавена од Римокатоличката епархија во Бруклин.

По снимањето на видеото, бискупот Роберт Бренан во изјава за Католичката новинска агенција рече дека е вознемирен што поп-ѕвездата снимила „провокативен“ спот во црква. „Прохијата не ја следела епархиската политика во однос на снимањето на црковниот имот, што вклучува проверка на сцени и сценарија“, рече тој.

Сликите од видеото на Карпентер покажуваат распетие со вулгарности испечатени на него, а исто така Карпентер танцува на олтарот во краток црн фустан.

Епархијата во тоа време рече дека е „згрозена“ и дека не биле почитувани соодветните процедури за снимање.