По четири и пол години, искусниот дефанзивец Стефан Ристовски ја заврши својата кариера во хрватскиот фудбалски клуб Динамо Загреб.

Македонскиот фудбалер го облече дресот на „модрите“ на почетокот на февруари 2021 година и оттогаш освои осум трофеи: четири шампионски титули, две титули во Купот на Хрватска и два Суперкупа. Во сите четири европски обиди со Динамо, тој стигна до групната фаза од натпреварувањето, двапати во Лигата на шампионите, со пласман во нокаут-фазата на Лигата на Европа и во Конференциската лига.

Тој одигра 185 официјални натпревари за Динамо со седум голови и 21 асистенција. Ако се додадат и пријателските натпревари, бројката се искачува на 206 настапи. Веднаш по пристигнувањето во Динамо, во пролетта 2021 година, тој учествуваше во еден од најголемите натпревари во историјата на клубот, во незаборавниот камбек против Тотенхем и победата од 3:0 за пласман во четвртфиналето на Лигата на Европа.

Навивачите на Динамо го засакаа уште во неговите рани денови, првенствено поради неговата огромна енергија, посветеност и страст. Тој секогаш гордо го носеше дресот на Динамо на теренот и на крајот стана еден од ко-капитените на тимот.

– Целиот тим на Динамо му се заблагодарува на Стефан за сè што даде за нашиот клуб и му посакува многу среќа и успех во остатокот од неговата кариера – стои на крајот од соопштението на Динамо Загреб.