Македонската ска-панк група „Суперхикс“ го издаде најновиот студиски албум „Сила и нервоза“, а неговата промоција ја започнаа со истоимениот сингл, соработка со музичката група „Фолтин“.

Песната „Сила и нервоза“ е плод на долгогодишното музичко скопско-битолско пријателство и носи една локална, многу вистинита порака.

Ова музичко парче е снимено во студиото „Тра ла ла“, под продуцентска палка на Мите Димовски. Што се однесува до видеозаписот, сите членови на „Суперхикс“ и „Фолтин“ учествуваа во снимањето.

Албумот е веќе достапен на сите музички платформи, а обожавателите на „Суперхикс“ ќе можат да го набават и во физичка форма, односно како цеде. Како што најавија музичарите од „Суперхикс“, наскоро ќе биде објавен и винилот.