Македонската актерка Симона Живковска, која живее и работи во Велика Британија, минатата година имавме прилика да ја видиме на големото платно, во блокбастерот „Black Widow“. Имено, овој филм беше прв од ваков вид во кој се слушна македонскиот јазик, бидејќи Симона со својата филмска партнерка комуницираше токму на македонски.

Како што пишува во нејзината биографија, Симона е родена во Скопје, и по мајка ѝ има македонско потекло, а по татко ѝ – западноиндиско, бидејќи тој е од Свети Мартин. Таа во 2001 година, заедно со семејството, се преселила во Велика Британија, каде подоцна ја започнала и својата актерска кариера.

Симона е активна на сите социјални мрежи и таму неретко споделува дека е горда на своето македонско потекло. Во една од последните објави на социјалната мрежа Тик-ток, таа со забавно видео им одговори на оние кои велат дека не личи на Македонка.

@simonazivkovska Oh I’m sorry..let me just.. #youdontlook #fy #fyp #macedonian #balkantiktok #macedoniantiktok ♬ you dont look macedonian – ме викаат кате

Минатата година, во интервју за „Слободен печат“, Симона изјави дека додека посетувала основно училиште во Велика Британија секогаш се чувствувала „како црна овца“, бидејќи било очигледно дека не е Британка – не само поради изгледот, туку и поради името.

– Луѓето речиси секогаш прашуваа од каде сум и кога ќе дознаеја, само еден од петмина всушност знаеја каде е Македонија. Како и да е, јас секогаш бев горда на своите корени и тоа е затоа што мајка ми е највлијателната личност во мојот живот. Секогаш ќе ѝ бидам благодарна. Растејќи, таа секогаш нè учеше како да бидеме горди, бестрашни и независни. Мајка ми секогаш зборуваше на македонски јазик дома и многу ми е мило што всушност го правеше тоа. Живеењето во Велика Британија, додека дома владееше македонската традиција и култура, беше најдоброто нешто што можеше да ни се случи мене и на мојот брат. Тоа нè втемели и ни обезбеди да имаме голема благодарност кон животот што сме благословени да го живееме со можности на секој агол, раскажа Симона за „Слободен печат“.

ГАЛЕРИЈА | Симона Живковска, актерка со македонски корени го освојува Холивуд: Никогаш не откажувајте се од вашите соништа!