Фудбалерите на Јувентус со 3:0 го совладаа Кротоне во последниот натпревар од 23. коло во Серија А и ја продолжија трката да фатат приклучок лидерот на табелата, Интер. „Старата дама“ сега има 45. бода, осум помалку од Интер, но во исто време има и натпревар помалку од „нераѕурите“.

Резултатот го отвори Кристијано Роналдо со голот во 38. минута по одличната асистенција од Алекс Сандро. Во последните моменти од првото полувреме, Јувентус поведе со 2:0 и повторно стрелец беше Роналдо, овој пат по асистенција на Арон Рамзи.

Во второто полувреме, фудбалерите на Јувентус ја продолжија доминацијата и таквата игра ја крунисаа со нов гол. Овој пат стрелец беше Вестон Мекени во 65. минута од натпреварот.