Стотици граѓани вчера ги исполнија училниците во кои се одвиваше гласањето за седмите локални избори. Дури и по затворањето на избирачките места, избирачките одбори до доцна во ноќта останаа во училиштата за да ги пребројат гласовите. Од друга страна, веќе во седум часот утринава во истите училишта започнаа да пристигнуваат учениците.

„Утрински брифинг“ денеска го посети основното училиште „Невена Георгиева -Дуња“ со цел да дознае дали персоналот вработен во училиштето  имало време да ја направи неоходната дезинфекција, со цел да спречи евентуално ширење на вирусот ковид-19.

– Во нашето училиште до 01.30  останаа избирачките одбори. Според планот кој претходно го направивме, во шест часот утринава, екипи од општина Кисела Вода започнаа со темелна дезинфекција, од дворот на училиштето до ходниците и училниците. И ние како училиште помогнавме што побрзо и поефикасно да се дезинфицираат училишните клупи и столчиња, тоалетите и кваките, ни објасни Хари Стојаноски, директор на ОУ „Невена Георгиева-Дуња“.

Тој додава дека нема голема опасност од ширење на вирусот поради тоа што секојдневно се внимава на дезинфекција на училиштето, дури и кога нема гласање.

Во Косово каде што вчера исто така имаше избори, денеска училиштата се затворени, а наставата се одвина онлајн. Оваа одлука е донесена за поголема заштита на учениците и можност за темелна дезинфекција на училиштата   каде што се гласаше.