Воопшто не е наивно ниту пак случајно, тоа што САД на црната листа ги додадоа мајката на бизнисменот Орце Камчев, (Ратка Камчева)  и брачната двојка Сергеј и Ирина Самсоненко, коментира во гостувањето во „Слободен печат“, професорката од Факултетот за безбедност Фросина Ременски. Тие на црната листа на САД им се придружија на веќе „листираните“ Сашо Мијалков, Никола Груевски како и фирмата „Сајтрокс“, која од Скопје произведе шпионски софтвер за следење на комуникациите на мобилните телефони кој е подложен на злоупотреба за софистицирано следење за уцена, загрозување на човековите права и влијание врз демократиите.

Ременски е децидна дека од аспект на безбедноста, ставањето на црната листа е предупредување за земјите дека не им функционира системот кој треба да ги следи финансиските дејствувања на фирмите и лицата во поглед на економската безбедност на земјата. Економската безбедност во земјава, додава Ременски, треба да ја овозможат непорозни и некорумпирани институции што нема да пропуштаат да регистрираат перење пари.

– САД имаат извонреден систем за контрола и следење на парите. Затоа тие не опоменуваат дека за овие луѓе во случаи кои се познати за македонската јавност а завршија како што завршија, недоволно јасно сме ги утврдиле модалитетите и модус-операндито на технологијата за перење пари. Тоа значи дека потфрлила Управата за финансиско разузнавање, банкарскиот систем кој тоа не ѝ го сигнализирал на финансиската полиција. Тоа е еден систем, односно ланец кој укажува дека овие лица се закана за нашиот финансиски систем, изјави Ременски.

Таа додаде дека Управата за јавни приходи има право и обврска после сите овие укажувања да ги исконтролира сите можни форми на даночно затајување, прикривање на добивка и оданочување на добивките на овие правни и физички лица кои вешто низ годините успеваат да се протнат низ сивите зони на системот, кој очигледно не е доволно развиен да ги детектира и соодветно да ги санкционира.

-Овие лица кои се на црната листа не функционирале сами, туку имале цел ланец на услужно ориентирани политичари, службеници во државни институции кои тоа им го овозможувале. Верувам дека следниот чекор на САД е на црната листа да стават луѓе од политичкиот и безбедносниот сектор кои тоа цело време го овозможувале, го пропуштале и не го спречувале за да се случат сите оние нотирани дејствија што ги дава ОФАК и САД, посочи професорката.

Целото интервју погледнете го во продолжение.