Најмалку тројца луѓе се повредени во пукање што се случи во среда наутро во канцеларијата на американската Служба за имиграција и царина (ИЦЕ/ICE) во Далас, Тексас, потврди вршителот на должноста директор на агенцијата, Тод Лајонс, пренесе Си-ен-ен.

„Првичните извештаи укажуваат на можен снајперски напад. Во моментов имаме три лица кои се погодени и пренесени во болница. Нема информации за нивната состојба“, изјави Лајонс.

Министерката за внатрешна безбедност, Кристи Ноем, соопшти дека осомничениот напаѓач се самоубил. Засега не е познато дали жртвите се вработени во ICE.

„Деталите сè уште пристигнуваат, но можеме да потврдиме дека има повеќе повредени и мртви,“ објави Ноем на платформата Х. „Иако мотивот е непознат, јасно е дека нашите службеници на ICE се соочуваат со невидено насилство. Тоа мора да престане.“

Полициски извори дополнително потврдија дека меѓу ранетите има и двајца притворени имигранти. Во објектот вообичаено се наоѓаат вработени во ICE, цивили и лица во притвор.

Полицијата и федералните агенти остануваат на местото на инцидентот додека трае истрагата.