По два дена неизвесност, утрово знаци на подобрување покажа Феликс, кучето кое крвнички беше истепано од вработен во „Момин Поток“. Од ЈП „Лајка“ велат дека и покрај монструозното насилство кое го доживеа Феликс, денеска се гали и се радува на човечки допир.

-Посилен од 20 удари со метална шипка, срце на јунак и покрај монструозното насилство кое го доживеа. Феликс денес се гали, се радува на човечки допир и ни верува дека сме тука за да му помогнеме. Се надеваме дека полека излегуваме од критичната фаза, иако постојано е под терапии заради оток на главата, потрес на мозок и неконтролирано мокрење. Важно е дека е свесен и респонзивен! – велат од претпријатието.

Здружението за заштита на животни „АНИМА МУНДИ“ вчера објави вознемирувачко видео на кое се гледа како еден вработен брутално тепа куче.

ВОЗНЕМИРУВАЧКО ВИДЕО | Вработен во фирма во „Момин Поток“ крвнички тепа куче

– Страотен облик на суровост и изживување врз мирно бездомно животно во фирма во Момин Поток – куче над 20 пати зверски удирано по глава од вработен! Во друштво на четири полнолетни лица, мажи, мирно бездомно куче е удирано со дебело дрво, најкрвнички и со сета сила, без било кој да интервенира додека кучето урлика од болка и не можејќи да избега или се спаси; случај кој ќе останеше невиден доколку не беше евидентиран на камерите за видео надзор – велат од Анима Мунди.

Од Здружението за заштита на животни, Анима Мунди велат дека државата мора да ја препознава и најстрого да ја казнува суровоста кон животните.