Денеска во Минхен најдобрата фудбалска репрезентација на Португалија со 2:1 славеше против Германија во првото полуфинале на Лигата на нации.

Сите погодоци беа реализирани во текот на второто полувреме, поведоа Германците со голот на Вирц во 48 минута.

Избраниците на селекторот Роберто Мартинез направија комплетен пресврт за пет минути.

Најпрвин за израмнување се погрижи Франсиско Консеисао во 63 минута, а конечниот епилог го постави Кристијано Роналдо во 68 минута.

Португалците во финалето на 8 јуни на „Алијанц Арен“ ќе играат против победникот од вториот полуфинален меч кој е закажан за в четврток од 21.00 часот во Штутгарт меѓу селекциите на Шпанија и Франција.

Португалија досега еднаш го освои ова натпреварување откако во 2019 година славеше против Холандија со 1:0 во Порто.