Тим истражувачи од Универзитетот во Сиднеј направи значајно откритие на дното на Тихиот Океан, користејќи подводен робот за снимање на претходно неистражени предели.

Ваквите роботи, или автономни подводни возила (АУВ), сè повеќе се користат за научни цели, објавува „Лед бајбл“.

Австралискиот центар за роботика (ACFR) управува со овие роботи, кои се опремени со најсовремена опрема, вклучувајќи камери и навигациски сензори. Благодарение на нив, беа собрани десетици илјади слики од морското дно.

Професорот Стефан Вилијамс го предводеше тимот што мапираше дел од океанското дно кој досега никогаш не бил детално испитан. Технологијата им овозможи на истражувачите да создадат јасна слика за тоа што лежи во длабочините.

„Ова е првпат делови од океанското дно, во близина на островот Норфолк, да бидат снимени во толку висока резолуција“, рекол Вилијамс.

Тој додава дека визуелните и акустичните сензори на АУВ собирале податоци за да создадат тридимензионални модели на морското дно и морските живеалишта.

„Беше наше задоволство да ја поддржиме оваа експедиција“, нагласил Вилијамс.

Истражувањето е спроведено во водите во близина на Норфолк, мал австралиски остров кој се наоѓа на околу 1.500 километри источно од Бризбејн.

Океанот што го опкружува островот е богат со корални гребени кои биле неистражени. Според Универзитетот во Сиднеј, областа е дом на разновидна флора и фауна.

Потонатиот воениот брод HMS „Сириус“, кој се насука на корални гребени во 1790 година, исто така се наоѓа во близина. Научниците се надеваат дека, доколку временските услови дозволат, ќе можат да ја посетат и оваа историска локација.

Австралискиот центар за роботика претходно работел на слични проекти, а за време на една од претходните експедиции, во потонат древен грчки брод е пронајден скелет стар 2.000 години.

Благодарение на претходно невидените слики од морското дно во близина на островот Норфолк, истражувачите ќе создадат прецизни тродимензионални модели на подводниот свет.

Покрај визуелните записи, собрани се и примероци од морски организми, што ќе помогне не само да се види, туку и да се разбере кој го населува овој досега скриен подводен свет.