Редовно, секој викенд падините на Скопска Црна Гора се дестинација на стотина ентузијасти, планинари – рекреативци, од сите генерации. Сите патеки водат кон главното собиралиште Спирова колиба која е на 1483 метри надморска височина. Поупорните и оние со повеќе кондиција и елан може да одат и погоре, кон Црн Камен на над 1585 метри надморска височина.

Во саботата членовите на Планинарскиот спортски клуб Скопска Црна Гора го прославија 12-тиот роденден, како што доликува, со веселба, скара и торта. Клубот има и подмладок кој учи на самото место како да се грижи за природата, како да се надоградува шумскиот појас, преку пошумување па редовно се засадуваат млади фиданки кои години подоцна ќе го збогатат шумскиот фонд.

Дури и литванската амбасадорка Вилма Дамбраускиене која со сопругот се искачи по Спировата патека засади дрво, некриејќи го своето задоволство и воодушевување од атмосферата и пријателското расположение кое го шират вљубениците во природата и алпинизмот.

За жал, предупредуваат планинарите со кои разговаравме, многу често во нивните алпинистички авантури наидуваат на дрвокрадци кои немилосрдно ја сечат шумата и потоа ја носат во правци на селата на периферијата на Скопје. Блиските средби со дрвокрадците во незаштитената шума на Скопска Црна Гора не се нималку пријатни бидејќи планинарите често добивале и закани со огнено оружје да си продолжат по патот.

Посведочивме со снимки дека навистина се случува масакр на дрвјата во шумата. Со возила се пренесуваат во разни правци, а отсуствува шумарска служба која заедно со полицијата ќе ја штити шумата од дрвокрадците.