Македонскиот атлетичар Огнен Стефановски на Европското тимско првенство го собори еден од најстарите национални рекорди во скок со стап кој датираше од далечната 1968 година.

Претходниот рекорд беше во сопственост на Владимир Карер, атлетичар на Вардар.

Сега изнесува 4.05 метри со освоено високо петто место и големи 11 бодови за Македонија на Европското тимско првенство што се одржува во Марибор, Словенија.

Во текот на вчерашниот ден Андреас Трајковски освои прво место во скок во далечина, потоа Дарио Ивановски беше првопласиран во дисциплината 5000 метри.

Втора позиција освоија Андреа Трајковски, Марко Алексовски, Михаил Петров и Јован Стојоски на 4×100 штафета поставувајќи национален рекорд 40,89 секунди.