Некои деца кои страдаат од малигни заболувања добиваат нов вид третман со многу помалку токсични лекови од хемотерапијата. Артур (11) е еден од првите што го примиле лекот блина во лондонската болница „Грејт Ормонд Стрит“, како третман за рак на крвта.

Неговото семејство ја нарече терапијата „сончев зрак“ бидејќи делувала и на Артур не му се слошило многу. А бидејќи овој лек може да се прими секаде, не само во болница, тој поминувал повеќе време дома со семејството, уживајќи повеќе во она што го сака, пишува „Би-би-си“.

Exciting new cancer drug kinder than chemotherapy https://t.co/cS5k3uO0kq

— BBC News (World) (@BBCWorld) January 17, 2024

Терапијата ја носел со себе во ранецот, неговиот „блина ранец“. За Артур, блинатумомаб или блина биле единствената вистинска опција откако хемотерапијата не успеала целосно да ги отстрани малигните клетки и го направила многу слаб.

Блина веќе има лиценца за лекување на возрасни болни од рак, а експертите се надеваат дека ќе докаже дека може безбедно да им помогне и на децата. Околу 20 центри низ Британија го користат експериментално за деца со Б-клеточна акутна лимфобластична леукемија (B-ALL). Лекот е имунотерапија која ги бара клетките на ракот за да може имунолошкиот систем на телото да ги препознае и уништи. Овој лов е прецизен – здравите клетки остануваат недопрени – за разлика од хемотерапијата.

Блина доаѓа во кеса со течност и се дава преку тенка пластична цевка која минува низ вената на раката на пациентот во текот на неколку месеци. Пумпата која работи на батерии контролира колку брзо лекот влегува во крвотокот – кесата може да трае со денови. Целиот сет може да се носи во ранец помал од учебник А4, што го прави целосно пренослив.

За Артур, ова значеше дека може да прави други работи – да игра во локалниот парк – додека се лекува. И за разлика од неговата интензивна хемотерапија, која сепак престана да работи, тоа не го направи премногу слаб за да ужива во секојдневниот живот.

Како и другите пациенти со блина, на Артур му биле дадени лекови за да се намали можноста за сериозни реакции или несакани ефекти пред да започне инфузијата. Првично имал напади на треска и морал да остане во болница на преглед. Но, набргу потоа, тој можел да си оди дома. Ранецот секогаш бил со Артур, вклучително и кога тој бил во кревет. Но, иако пумпата прави бучава, тој можел пристојно да спие. Хемотерапијата била тешка за Артур и префрлувањето на блина било олеснување, изјавила неговата мајка Сандрин:

“Болеста беше целосно надвор од контрола, живеевме во постојан страв бидејќи неговото тело беше ослабено од лековите. Неговата состојба се влошуваше, многу е тешко тоа да се прифати.

Артур мораше да се враќа во болница на секои четири дена за да може лекарите да го надополнат комплетот за лекување, но остатокот од времето можеше да се лекува дома. Уживаше да го чува ранецот и да биде одговорен, сето тоа го прифати“, изјави Сандрин.

И на крајот на април 2023 година, Артур ја имал последната процедура за отстранување на инфузијата од раката.

„Тоа беше голем чекор – тој беше слободен“, изјавила Сандрин.

Лекарите велат дека блина може во голема мера да ја замени хемотерапијата – можеби и до 80 отсто. На околу 450 деца годишно во Велика Британија им е дијагностициран типот на рак од кој боледувал Артур.

Главен истражувач и педијатриски хематолог проф. Аџеј Вора изјави за „Би-би-си“: „Хемототерапијата се отрови кои ги убиваат клетките на леукемијата, но тие исто така ги убиваат и оштетуваат и нормалните клетки – и тоа е она што ги предизвикува несаканите ефекти. Блинатумомаб е понежниот, пољубезен третман“.

Друг насочен лек за имунотерапија, терапија со Т-клеточни рецептори на химеричен антиген (CAR-T), исто така неодамна стана достапна. Но, тоа е поскапо од блин и самите клетки на пациентот мора да се земат и потоа да се променат во лабораторија пред да се вратат во телото како лек, за што е потребно време. Благодарение на овој третман, ракот на Артур исчезнал.

„На Нова Година дознавме дека лекот делува и дека нема остаток на рак. Беше неверојатно и имавме двојна прослава“, заклучила Сандрин.